相信唔少人都聽講過戰國時期嘅曾侯乙墓編鐘，佢係中國迄今為止數量最多、保存最完好嘅一套青銅編鐘。編鐘上因有銘文「曾侯乙作持」而得名，雖然已經埋喺地下2000幾年，宜家依然可以演奏樂曲，且音律準確，音色優美，絕對可以稱得上係「天下第一樂器」。

不過，呢套編鐘原來差啲長埋黃土，據最早發現曾侯乙墓嘅王家貴憶述，佢當初因為工作需要，要喺隨縣擂鼓墩度起兩個修車間，但當佢推土推到一半，見到啲土明顯有兩種唔同顏色，佢懷疑中間嘅土係之後人工填返嘅，於是停咗落嚟。因為王家貴之前學過建築，佢堅持裡面有古墓，於是向上頭彙報，但上頭派咗啲唔係專家嘅行政人員嚟勘察之後，否定咗佢嘅推測。王家貴無辦法，唯有照施工。不過今次王家貴好小心操作，終於被佢挖到石板，最後發現曾侯乙墓。如果唔係王家貴堅持，兼且精准咁控制施工方法，咁曾侯乙墓入面果15000幾件文物，包括曾侯乙編鐘，就會同混凝土融為一體。

曾侯乙編鐘至今已經出土超過40年，不過為咗保護文物，呢套編鐘只係複製咗5套。其中，還原度最高果套複製品留咗喺台灣鴻禧美術館，而其餘4套分別喺湖北省博物館、陝西黃帝陵等地方。曾侯乙編鐘嘅真品同樣喺湖北省博物館，而館內嘅複製品主要用嚟演奏古典樂曲同表演編鐘，等參觀者有機會聽到千年之前嘅悠揚樂韻。

原圖嚟自網絡。